Хайлт хийх үг

Números 16

Coré chachan Moisés contra sayt'asitapamp, mutuyäwipampi

1Mä levitaw utjäna Coat chachan wawapänwa, Coré sutini, Izhar sat chachan wawapa, uqhamarac Rubén tribuna quimsa jakenacapampi cuna Datán, Abiram sat Eliab chachan wawanacapa, uqhamarac On sat Pelet chachan wawanacapa. 2Jupanacasti Moisés contraw sartapjjäna, jupanac chicasti sartapjjaraquïnwa pä patac pheska tuncani israelitanacampi cuna, uca jakenacasti marcanjja jilïrinacäpjjänwa, uqhamarac amuyt'ayiri jakenacäpjjänwa, takeninsa wali uñt'ata. 3Take jupanacaw tantachasisinjja Moisesana Aaronampina nayräjjaparu uñstapjjäna, aqham sasa:

—¡Jumanacaquiw take cunsa lurasipctajja! Takpach marcaw Tatitu Diosar catuyata, Tatitusti take nanacampïscaraquiwa. ¿Cunatsa jumanacajj mä jilïrinacjama Tatitun marcapjjaru sartapjjta? —sasa.

4Moisesasti uca ist'asinjja oraker ajanup puriñcamaw alt'äna, 5ucatsti Coré jakempiru, arquirinacapampirojj sänwa:

—Arumanthiw Tatitojj yatiyani qhitis jupanqui, qhitiraquisa jupar catuyata, qhitisa juparu ofrendanac churaspa ucanaca, cawquïrirutejj jupajj ajlliscani, ucaquiw ofrendjja loktaraquini. 6Aqham lurapjjam: Apanipjjam Coré chachana, uqhamarac jilanacapan incensarionacapa, 7uchapjjam q'illiminaca, ucjjarusti incienso warjjatapjjam, ucatsti arumanthejj Tatitun nayräjjapar uchanipjjam, cawquïri jakerutejj Tatitojj ajlliscani ucaw Tatitur catuyatäni. ¡Jichhajj ucqhaquïpan, levitanaca!

8Ucatsti Moisesajj Coré chacharojj sänwa:

—Ist'apjjeta, levitanaca. 9¿Amuyatanacamatjja juc'aquiti Israel marcan Diosapajj jumanacaru ajllipctam Israel marca taypitjja, jumanacan jupa jac'ancañataqui, ucatsti Tatitun kollan chekan irnakañataqui, uqhamarac marcan luräwinacapar phokhañataqui? 10Tatituw muni, jumana, uqhamarac mayni jilanacaman Leví sat tributjja jupanacampi jac'ancañanacama. ¿Jichhasti sacerdotet sarnakañti munapjjta? 11Chekpachansa Aaronajj janiw qhitïquisa jupat parlasitanacamajja; Tatitu contraw jumasa, jilanacamasa sartapjjtajja —sasa.

12Ucatsti Moisesajj, Datán, Abiram sat Eliab chachan wawanacaparuw jawsayir qhitäna, ucampis jupanacajj sapjjänwa:

—Janiw sarapquiristti —sasa. 13¿Amuyatamatsti juc'aquiti irpsunitamasti, cawqha orakentejj lechesa, misq'isa umjam jalasqui ucatjja, wasaran nanacaru jiwarayañataqui, ucampisa jumajj jach'a jilïrinacajjäñ munatamasti? 14Jumasti janiw yakha orakerojj irpapquistati, cawqhantejj leches, misq'is umjam jalasqui ucarojja, janiraquiwa ni yapunacsa, ni uva yapunacsa churapquistati. ¿Muntati takenin irpayasiñapa mä juyqhuru uñtata? Janiw sarapquiristti jumar uñjirejja —sasaw uca jakenacajj sapjjäna.

15Ucatsti Moisesajj wal colerasïna, Tatiturusti sänwa:

—Jan ofrendanacapjja catokamti. Janiw nayajj jupanacarojj ni mä asnopsa aparcti, janiraquiw cawquïri jupanacarusa jan wali lurcaracti.

16Ucatsti Moisesajj Coré chacharojj sänwa:

—Jumasa, jilanacamasa arumanthpacha Tatitu nayrakatana uñstapjjam. Aaronasti ucancaraquiniwa. 17Sapa mayniw incensariop apasini, ucatsti incienso uchapjjani. Jumasa, Aaronasa, apasipjjätaw incensarionacamjja, incienssti uchapjjätaw sapa mayni, pä patac pheska tuncanimp chica, Tatitun nayrakatapana —sasa.

18Ucatsti sapa mayniw incensariop apjjarusïna, akasquir q'illimimpi, inciensompi uchapjjäna, Moisesampi, Aaronampi chicaraquiw sayt'asipjjäna, Tatitumpi Jiquisiñ Carpa nayrakatana. 19Coré chachasti niyaw takpach marcaru tantachäna jupanac contra, Jiquisiñ Carpa uñcatasina. Ucapachasti Tatitun jach'a cancañapaw takpach marcaru uñacht'ayasïna. 20Ucatsti Tatitojj Moisesampiru Aaronampiruw säna:

21—¡Jithektapjjam aca marcata, nayaw anchhita jupanacar t'unjä! —sasa.

22Ucampis jupanacajj ajanunacap oraker puriyañcamaw alt'apjjäna, ucatsti sapjjaraquïnwa:

—Dios Tata, jumaw take jakenacarus jacañ churta, ¿takpach marcampiti colerasïta mä sapa jaken juchapatjja? —sasa.

23Tatitusti Moisesarojj sänwa:

24—Take israelitanacar sanim, jithektapjjpan carpata, cawqhantï Coré, Datán, uqhamarac Abiram chachanacajj utjapqui ucqhatjja —sasa.

25Moisesasti Israelan jilïrinacapampi chicaw sarapjjäna, cawqhantejj Datán, uqhamarac Abiram jakenacajj jicjjatasipcän ucqharu. 26Ucatsti marcpacharuw säna:

—Jithektapjjam uca juchan ñankha jakenacan carpanacapatjja, janiraqui llamct'apjjamti cunatejj jupanacancqui ucanacjja, jan jumanacasa juchanacapat jiwapjjañamataqui.

27Take marcpachaw jithektapjjäna Coré, Datán, Abiram jakenacan jac'anacapatjja. Datán, Abiram uca jakenacajj carpa mantañanacapancasipcänwa, warminacapampi, wawanacapampi chica. 28Moisesasti parlascaquïnwa aqham sasa:

—Acampiw yant'apjjäma: Tatituw nayar qhitanitu take acanac lurañataqui, janiw nayan munañajjaru lurcti. 29Aca jakenacatejj maynïri jakenacjam jiwapjjani ucqhajj, Tatitusti janiw nayarojj qhitanquituti; 30ucampisa Tatitutejj mä jach'a uñacht'äwi lurani, uqhamarac orakesa jist'artani jupanacaru mank'antasa take yänacapampi chica, ucatsti jacasquirpacha jiwañarojj mantapjjani, ucapachasti jumanacajj yatipjjätaw aca jakenacaw Tatiturojj jisc'achapjjäna.

31Cunapachatï Moisesajj parlaña tucuyjjäna, ucapachaw orakejj jupanac mankheta jist'artäna. 32Ucatsti take cawquïri jakenacatejj Coré chachampi chicäpcäna ucanacaruw mank'antäna, take familianacapamp, yänacapampi chica. 33Jacasquirpachaw orak mankher jalantapjjäna, take cunatejj utjcäna ucanacampi chica, ucatsti orakejj jist'antasjjänwa. Uqhamaw israelitanac taypitjja jiwarayatäpjjäna. 34Take cawquïri israelitanacatejj uca thiyanacan jicjjatasipjjäna ucanacajj warariri ist'asinjja, walpin jaltjjapjjäna aqham sasa: “Inampis jiwasarus uqham mank'antcaraquistaspa” sasa. 35Uqhamaraquiw Tatitojj mä nina apayanïna, ucatsti jiwarayänwa, pä patac pheska tuncan jakenacaru, cawquïrinacatejj incienso loktapcän ucanacaru.

36Ucatsti Tatitojj Moisesarojj sänwa:

37“Aarón chachan Eleazar sat yokapar qhitam, uca nina naqhantat taypinacat incensarionac apsuniñapataqui, ucatsti jayaru jaktanpan cuna akasquir q'illiminacatejj utjasqui ucanaca. 38Cawquïri jakenacatejj juchanacapat jiwapqui ucanacan incensariopajj k'omachatäjjewa nayan nayrakatajjana, incienso loktañataqui. Uca metalanacjja laphinacaru tucuyapjjam altararu muyuntayañataqui, uqhamarac israelitanacataquejj amtasiñatac uchatäpan.”

39Eleazar sacerdotesti uca jakenacan broncet lurat loktañanacapa apthapisinjja, laphinacaruw tucuyjjäna, altarar muyuntayañataqui. 40Ucasti israelitanacan amtasipjjañapataquïnwa, Aarón chachan wawanacapat sipansa, janiraquiw qhitisa altarar jac'achasiñapäcänti, Tatituru incienso loktañataquejja. Janitejj ist'asipcani ucqhajja, Coré chacharu, jilanacapampiru pasqui uqhamaw lurasiraquini cawquïri jaketejj loktañ munqui ucampejja. Uqhamaw phokhasïna cunjämatejj Tatitojj Eleazarar siscatayna Moisés toke uqhamarjama.

41Khepärmanthisti take Israel marcpachaw Moisés contra, uqhamarac Aarón contra maynit maynicam parlañ kalltapjjäna aqham sasa:

—Jumanacajj Tatitu Diosan marcaparuw jiwayasipctajja —sasa.

42Takpachaniw muyuntapjjäna Moisesampiru, Aaronampirojja, ucampisa jupanacajj Jiquisiñ Carpäquisa ucsaruw sartawayjjapjjäna. Uca horasanwa kenayajj imantäna, ucatsti Tatitun jach'a cancañapaw uñstäna. 43Ucatsti Moisesampi, Aaronampejj Jiquisiñ Carpan uñcatasiparuw sarapjjäna, 44ucatsti Tatitojj Moisesarojj sänwa:

45—Jithektapjjam take uca jakenacata, nayaw anchhita jupanacar t'unjä —sasa.

Moisesampi, Aaronampejj oraker p'ekenacap puriyañcamaw alt'apjjäna, 46Moisesasti Aaronarojj sänwa:

—Aptanim incensarioma, altarata ninjja ucharaquim, ucatsti incienso warjjatam. Ucatsti saram marca thiyaru, jupanacataqui Diosat perdón mayiraquim, Tatitun colerasiñapaw sartani uca laycu, usunacas niyaw kalltaniraqui.

47Aaronasti luränwa Moisesan arsutaparojja, ucatsti jalasaw saräna cawqhantejj marcajj tantachasïna ucqharu. Cawquïri ustejj Diosajj apayanïna ucajj niyaw marcan jakenacarojj usurayäna. Ucatwa Aaronajj incienso uscusina Diosatjja perdón mayïna marcpachataqui. 48Ucapachasti jiwatanac taypiru, uqhamarac jacasquirinac taypiruw mantäna, ucat usojj apaktawayjjänwa. 49Uca usumpi jiwatanacajj tunca pusin waranka pakallko patacani jakenacänwa, ucampisa janiraquiw jact'atäpcänti cawquïri jakenacatejj jiwarapcäna Coré chachas Dios contra sartascäna ucanacatjja. 50Cunapachatejj usojj apaktawayjjäna ucqhajj, Aaronasti cuttawayjjänwa Jiquisiñ Carpan mantañaparu Moisesampi jiquisiñataqui.

Qullan Arunaca

Biblia Aymara ©Sociedad Bíblica Boliviana 1997.

More Info | Version Index