Хайлт хийх үг

KEJADIN 34

Dina iperkosa

1I bas sada wari, Dina, e me anak Jakup ras Lea, erdalan-dalan njumpai piga-piga diberu kalak Kanaan. 2Kenca Sikem anak Hamor, kalak Hewi, kepala daerah e, ngidah si Dina, itagangina, iperkuasana. 3Tapi perbahan mejile iakapna singuda-nguda e, minter ngena atena, e maka iusahakenna maka ngena ka ate singuda-nguda e man bana. 4Ikatakenna man bapana, “Sungkun min singuda-nguda enda man ndeharangku.” 5Ieteh Jakup maka anakna enggo icemarken, tapi erkiteken anakna si dilaki i juma denga ermakan la kuga pa pe nina seh maka anak-anakna mulih ku rumah. 6E maka reh Hamor bapa Sikem ndahi Jakup. 7Sanga si e rembang ka reh anak Jakup si dilaki i juma nari. Kenca ibegina kai si enggo jadi, sengget pusuhna ras merawa ia, perban arah perbahanenna e enggo ijuruken Sikem bangsa Israel alu mperkuasa anak Jakup si diberu. 8Nina Hamor man bana, “Enggo leket ukur Sikem man anakndu si diberu. Bere min maka iempoina ia. 9Si persada min arihta maka banci si empon bangsa kami ras bangsandu. 10Alu bage banci kam tading i negeri enda ras kami, banci ipilih kam inganndu tading, bebas kam erbinaga, ras banci ibuat kam taneh jadi sikerajangenndu.”

11Kenca bage ngerana Sikem man bapa ras turang Dina, “Bere min pemindonku, maka kubereken kai saja si ipindondu. 12Kataken man bangku kai pemindondu, pindolah asa kai atendu tukurna; kubereken kerina pemindondu, gelah min iberendu aku erjabu ras ia.”

13Erkiteken enggo icemarken Sikem si Dina, e maka anak-anak Jakup si dilaki njabap Sikem ras bapana Hamor alu tipu. 14Nina, “La ibere kami erjabu turang kami ras sekalak si la isunat. E njuruken kami. 15Banci ibere kami turang kami erjabu adi kerina kam si dilaki isunatken bali ras kami. 16E maka kami nggit si empon ras kam, janah kenca bage maka kami ringan i tengah-tengahndu dingen jadi sada bangsa ras kam. 17Tapi adi la kam nggit bagi si ikataken kami ras isunatken, ibuat kami Dina lawes jenda nari.”

18Sarat-sarat si ikataken kalak enda, enggo bujur iakap Hamor ras anakna Sikem. 19E maka mintes ilakoken anak perana e kai si enggo isuruh, erkiteken ngenana atena man anak Jakup. Sikem me kalak si mehergana i bas keluargana.

20Lawes Hamor ras anakna Sikem ku ingan perpulungen i pintu gerbang kuta, guna ngataken man kalak kuta e. 21“Kalak enda kalak bujur-bujur; pelepas kalak enda ringan i bas negeri enda ras kita, ola larang ku ja atena. Taneh enda cukup belangna man kalak enda pe. Marilah si empoi anakna si diberu, janah sibereken iempoina anak-anakta. 22Bage pe kalak enda nggit tading ras kita, janah jadi sada bangsa ras kita, adi kerina kita si dilaki nggit isunatken, bali ras ia pe isunatken. 23Ma kin kerina kari asuh-asuhenna ras kerina sikerajangenna, jadi sikerajangenta? E maka siuekenlah maka ia banci tading ras kita.” 24Kerina si ngiani kuta e cocok akapna bagi si ikataken Hamor ras Sikem, e maka kerina si dilaki isunatken.

25Telu wari kenca si e, sanga mesui denga akap kalak e, lawes me Simeon ras Lewi, turang Dina, ku kuta e maba pedang alu la ise pe metehsa. Jenari ibunuhna kerina dilaki si lit i bas kuta e, 26termasuk Hamor ras anakna Sikem. Ibabana minter mulih Dina i bas rumah Sikem nari. 27Kenca jelma si nterem e enggo ibunuhi kalak enda duana, anak-anak Jakup si debanna ngerampuki kuta e. Enda me pembalasen si ibahanna erkiteken turangna enggo ijuruken. 28Ibuat kalak enda biri-biri, lembu, kelede, ras kerina si debanna si lit i bas kuta e ras i juma. 29Ibuatna kerina si lit ergana, itabanna kerina diberu ras anak-anak, jenari iangkatna kerina kasa kai si lit i rumah-rumah.

30Nina Jakup man Simeon ras Lewi, “Perbahanen kena e erbanca kuakap gulut nge e. Genduari nembeh me ate kalak Kanaan, kalak Peris ras kerina jelma si lit i bas negeri enda man bangku. La nterem anak buahku; e maka adi ipersada kalak enda kenca arihna ngelawan ras merang aku, e keri me kerina keluarganta.”

31Nina kalak enda, “La kami ngasup ngidah turang kami ijadiken bali ras diberu perdenggal.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index