Хайлт хийх үг

LEVÍTICO 19

Cashcata ruhuashpa, jucha illac causanamanta

1Mandac Dios Moisesta rimashpaca: 2«Tandanacushca israelcunataca: “Ñuca cancunata Mandac, jucha illac Diosmi cani. Chaimanta cancunapish jucha illac caichic.

3Cancunapac taita mamata cazunguichic. Samana punzhatapish huacaichinguichic. Ñucami cancunata Mandac Diosca cani.

4Ama ruhuashcalla dioscunata alli ninguichicchu. Ama fierrota yacuyachishpa dioscunata ruhuanguichicchu. Ñucami cancunata Mandac Diosca cani.

5Mandac Dios ñucahuan alli tucungapac animalta cushpaca, ñuca munashcata cunguichic. 6Ñucaman cushca animal aichataca chai punzha, cayandi punzhami micuna canguichic. Ashtahuanpish quimsa punzha tucucpica, chaica tucui rupachinami canguichic. 7Chai aichata quimsa punzhapi micucca mapami tucunga. Chaica mana chasquishachu. 8Maijanpish chaita micushpa, ñucapaclla chicanyachishcata yangata ruhuac runaca mana alli nishcami canga. Israelcunapuramantapish anchuchishcami canga.

9Granota cosechashpaca, ama tucui pitinguichu. Saquirishca granotapish ama murunguichu. 10Uvasta pallashpapish ama tucui pallanguichu. Pambapi urmashcatapish ama murunguichu. Chaicunataca huacchacunapish, caru llactamanta shamushcacunapish tandachun saquingui. Ñucami cancunata Mandac Dios cani.

11Ama shuhuanguichicchu. Ama llullanguichicchu shinallatac caishuc chaishuc ama umanacunguichicchu.

12Manapish pactachingapac ari nishpa, ama cancunata Mandac Diospac shutita yangapi churanguichicchu. Ñucami Mandac Dios cani.

13Shuccunata ama llaquichinguichu, ama shuhuanguichu. Trabajac runaman cunataca ama cayami cusha nishpa charicunguichu.

14Ringri mana uyac runata ama llaquichinguichu. Ñahui mana ricuc runa purinapi ama ima mitcarinata churanguichu. Chaipac randica, cambac Diosta manchangui. Ñucami Mandac Dios cani.

15Cashcata ruhuashpa allichingui. Huaccha cashcallamantapish ama paiman tucunguichu. Chayuc cashcamantapish ama paiman tucunguichu, ashtahuanpish cashcata ruhuashpa allichingui.

16Cambac llactapi ama huashalla parlashpa puringuichu.

Pitapish piñashpa, ama huañuchina yuyaihuan puringuichu. Ñucami Mandac Dios cani.

17Shuccunata ama cambac shungupi piñanguichu. Ashtahuanpish maipi pandaricushcata ricuchishpa cunangui. Mana cunashpaca juchayucmi tucungui.

18Shuccuna llaquichicpica, ama chai shinallatac canpish llaquichinguichu, ama piñashcalla puringuichu. Chaipac randica, can quiquin ima shinami cuyaringui, chashnallatac shuccunatapish cuyangui. Ñucami Mandac Dios cani.

19Ñuca mandashcacunata cazungui.

Cambac animalcunata ama chican animalhuan chayachinguichu. Cambac allpapipish ama tucuilaya muyucunata chapushpa tarpunguichu. Tucuilaya puchcahuan ahuashca churanatapish ama churaringuichu.

20Shuc servic soltera cazarangapac ari nishca cashpapish paipac amoman manarac cullquita cushpa cacharichishca cashpa, shuc carihuan chayarinacucpica, ishcaitatacmi llaquichina can. Shina cacpipish, mana huañuchinachu. 21Paipac juchata pichachunca, ñucahuan tupana huasi yaicunapimi shuc cari ovejata cuna can. 22Chaitaca curami juchata pichachun Mandac Dios ñucapac ñaupapi, ñucahuan alli tucuchun cunga. Chashna cucpimi, chai runapac juchacunaca perdonasha.

23Canaán llactaman chayashpa, micunata pucuc tucuilaya yuracunata tarpushpaca, punta pucushcataca saquinguichic. Quimsa huatacaman chai pucushcataca ama micunguichic 24Chuscu huatapica tucui pucushca granomi Mandac Dios ñucaman cushpa, cushichingapac chicanyachishca canga. 25Pichca huata tucucpica, chai yuracuna ashtahuan pucuchunca, chai cancunapac granotaca micui pudinguichicmi. Ñucami cancunata Mandac Dios cani.

26Imatapish ama yahuarndi micunguichu.

Brujo canatapish, adivino canatapish ama munanguichicchu.

27Umatapish ama muyundita rutuchinguichicchu. Barbastapish ama puntata pitichinguichicchu. 28Maijan huañushcamanta ama cancunapac cuerpota chugringuichicchu, ama cancunapac cuerpopi imapish ricunacunata ruhuanguichicchu. Ñucami Mandac Dios cani.

29Cambac ushi cullquimanta huainayachunpish ama saquinguichu. Chaica cancunapac llactaca huainayashpa causac, millai jundami tucunga.

30Samana punzhata huacaichinguichic. Ñucapaclla carpa huasitapish manchanguichic.

31Huañushcapac almacunamanpish, adivinacmanpish ama tapunguichicchu. Chaiman rishpaca mapayanguichicmi. Ñucami cancunata Mandac Dios cani.

32Yurac uma taitapac ñaupapi paita alli nishpa shayaringuichic. Ñucami Mandac Dios cani.

33Shuctac llacta runa shamushpa, cancunahuan causacucpi, ama llaquichinguichicchu. 34Paicunataca cancunapura cashca shinallatac cancunapac llactapica cuyanguichic. Cancunaca Egipto llactapica pozashpallami causacurcanguichic. Chaimanta cancuna ima shinami cuyaringuichic, chashnallatac paicunatapish cuyanguichic. Ñucami Mandac Dios cani.

35Ima llaquita allichinapipish, allpa medinapipish, imata pezanapipish, shuctac medinacunapipish ama ima mana allita ruhuanguichicchu. 36Balanzatapish, pezanatapish, yacu medinatapish, shuctac medinacunatapish allita charinguichic. Ñucami cancunata Egipto llactamanta llucchic Mandac Dios cani.

37Ñuca quillcachishpa mandashcacunatapish, ñuca yachachishcacunatapish yuyarashpa pactachinguichic. Ñucami Mandac Dios cani” ninmi ningui» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index