Хайлт хийх үг

Números 2

Li israeletique i'albatic c'u x'elan ta xcholan scarpanaic

1Li Muc'ul Diose la sc'opan li Moisés xchi'uc Aarone. Jech laj yalbe:

2“Scotol li achi'iltac ta israelale nom me jutuc ac'o spas scarpanaic ta spat xocon li ch'ulna pasbil ta nucule. Ta jujuchop ac'o yac' scarpanaic te ta yolon li sbanderaique xchi'uc ja' te ac'o yac' sbaic ti bu oy senyail yu'unic ta jujuchop sbiique.

3“Ta stuq'uil sloq'ueb c'ac'ale, ja' te ac'o spas scarpanaic li soldadoetic ti chanovic batel ta yolon bandera yu'un Judae. Li soldadoetic ti liquemic ta jchop yu'un Judae ja' me banquilal yu'unic li Naasón, xnich'on Aminadabe. 4Ja' ti iloq'uic ta atel chanlajuneb xchanvinic ta mil xchi'uc vaquib ciento (74,600) ta scotol li viniquetique. 5Te ac'o sts'ac batel scarpanaic ec li soldadoetic ti liquemic ta jchop yu'un Isacare, ja' banquilal yu'unic li Natanael, xnich'on Zuare. 6Ja' ti iloq'uic ta atel chanlajuneb yoxvinic ta mil xchi'uc chanib ciento (54,400) ta scotol li viniquetique. 7Te ac'o sts'ac batel noxtoc li soldadoetic ti liquemic ta jchop yu'un Zabulone, ja' banquilal yu'unic li Eliab, xnich'on Helone. 8Ja' ti iloq'uic ta atel vuclajuneb yoxvinic ta mil xchi'uc chanib ciento (57,400) ta scotol li viniquetique. 9Ti bu c'alal xlic scarpanaic li jchop liquemic ta Judae, oy oxvoc' soldadoetic xc'ot te. Ja' oyic vaquib slajunvinic ta mil xchi'uc chanib ciento (186,400) ta yoxchopalic li soldadoetic ti chanovic batel ta ba'yucbe yu'un li israeletique.

10“Ta stuq'uil sure, ja' te ac'o spas scarpanaic li soldadoetic ti chanovic batel ta yolon bandera yu'un Rubene. Li soldadoetic ti liquemic ta jchop yu'un Rubene, ja' banquilal yu'unic li Elisur, xnich'on Sedeure. 11Ja' ti iloc' ta atel o'lol svucubal yoxvinic ta mil (46,500) ta scotol li viniquetique. 12Te ac'o lic sts'ac batel scarpanaic ec li soldadoetic ti liquemic ta jchop yu'un Simeone, ti ja' banquilal yu'unic li Selumiel, xnich'on Zurisadaie. 13Ja' ti iloq'uic ta atel balunlajuneb yoxvinic ta mil xchi'uc oxib ciento (59,300) ta scotol li viniquetique. 14Te ac'o sts'aquic batel ec li soldadoetic ti liquemic ta Gade, ti banquilal yu'unic li Eliasaf, xnich'on Reuele. 15Ja' ti iloq'uic ta atel vo'ob yoxvinic ta mil xchi'uc o'lol svucubal ciento (45,650) ta scotol li viniquetique. 16Ti bu c'alal xlic scarpanaic li boch'otic liquemic ta Rubene, oy oxvoc' soldadoetic chc'ot. Ja' oy buluchib xvaxacvinic ta mil xchi'uc o'lol yo'obal ciento (151,450) ta scotol. Ja' ta xcha'tsobal xa chanovic batel.

17“Li levietique cacal ta o'lol ac'o batuc yu'unic chanvoc'uc israeletic. Cha'voc' ac'o batuc ta ba'yucbe. Cha'voc' ac'o batuc ta ts'acalpat. Li Levietique ja' ac'o yich'ic batel li ch'ulna pasbil ta nucule. Li chanvoc' israeletique ja' jech ac'o xanovicuc batel jech chac c'u cha'al xcholoj li scarpanaique, xchi'uc te ta yolon sbandera stuquic ac'o baticuc.

18“Ta stuq'uil smaleb c'ac'ale, ja' te ac'o spas scarpanaic li soldadoetic ti chanovic batel ta yolon li bandera yu'un Efraine. Li soldadoetic ti liquemic ta jchop yu'un Efraine, ja' banquilal yu'unic li Elisama, xnich'on Amiude. 19Ja' ti iloq'uic ta atel cha'vinic ta mil xchi'uc vo'ob ciento (40,500) ta scotol li viniquetique. 20Te ac'o lic sts'ac batel scarpanaic ec li soldadoetic ti liquemic ta jchop yu'un Manasese, ja' banquilal yu'unic li Gamaliel xnich'on Pedasure. 21Ja' ti iloq'uic ta atel lajchab xcha'vinic ta mil (32,200) xchi'uc chib ciento ta scotol li viniquetique. 22Ts'acal te ac'o sts'ac batel ec li soldadoetic ti liquemic ta Benjamine, ja' banquilal yu'unic li Abidán, xnich'on Gedeonie. 23Ja' ti iloq'uic ta atel vo'lajuneb xcha'vinic ta mil xchi'uc chanib ciento (35,400) ta scotol li viniquetique. 24Jech oy yan oxtsob soldadoetic te yo' bu lic spas scarpanaic li boch'otic liquemic ta jchop yu'un Efraine. Ja' oy vaxquib svacvinic ta mil xchi'uc vo'vinic (108,100) ta scotol li soldadoetic ti chanovic batel ta yoxtsobale.

25“Ta stuq'uil nortee, te ac'o lic spas scarpanaic li soldadoetic ti chanovic batel ta yolon bandera yu'un Dane. Li soldadoetic ti liquemic ta jchop yu'un Dane, ja' banquilal yu'unic li Ahiezer, xnich'on Amisadaie. 26Ja' ti iloq'uic ta atel chib xchanvinic ta mil xchi'uc vucub ciento (62,700) ta scotol li viniquetique. 27Te ac'o lic sts'ac batel scarpanaic ec li soldadoetic ti liquemic ta jchop yu'un Asere, ti ja' banquilal yu'unic li Pagiel, xnich'on Ocrane. 28Ja' ti iloq'uic ta atel o'lol xchibal yoxvinic ta mil (41,500) ta scotol li viniquetique. 29Ts'acal te ac'o lic sts'aquic batel ec li soldadoetic ti liquemic ta jchop yu'un Neftalie, ja' banquilal yu'unic li Ahira, xnich'on Enane. 30Ja' ti iloq'uic ta atel oxlajuneb yoxvinic ta mil xchi'uc chanib ciento (53,400) ta scotol li viniquetique. 31Ti bu chlic spas scarpanaic li jchop liquemic ta Dane oy yan oxtsob soldadoetic noxtoc. Oy vuclajuneb xvaxacvinic xchi'uc vaquib ciento (157,600) ta scotol li viniquetic ti chanovic batel ta slajeb te ta spat li bandera yu'unique”, x'utat yu'un Dios li Moisese.

32Ti jaychop totiletic ta jujubej na ta scotol li israeletique ja' vaquib ciento xchi'uc oxmil xchi'uc o'lol svaquibal ciento (603,550) ta scotol, ja' puru soldado scotolic. 33Pero li levietique mu'yuc xich'ic tsaquel ta atel. Ja' la xch'unic ti jech ono'ox albil yu'un Muc'ul Dios li Moisese.

34Li israeletique ja' jech la spasic scotol jech chac c'u cha'al albil yu'un Muc'ul Dios li Moisese. Ta jujuchopic te la spas scarpanaic ta yolon li sbanderaique, xchi'uc ta jujuchop ixanovic batel, xchi'uc ta jujuchop sbiic xcholet ibatic.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index